Сергеј Самсоненко (49) реши да стави крај на спонзорството во вардаровото семејство. Рускиот бизнисмен се обрати до јавноста со соопштение во кое ја изнесува својата дефинитивна одлука што, без сомнение, ќе претставува голем удар за спортот во Македонија.

Дописот до медиумите го пренесуваме интегрално.

Почитувани граѓани на Македонија, пријатели! 

Вчеравечер се вратив во Скопје и бев длабоко вознемирен од сето она што го прочитав во медиумите, на социјалните мрежи, порталите. Првото прашање што си го поставив себеси беше со што јас и моите колеги од Вардар заслуживме вакви навреди?

Македонија е дом за мене и за моето семејство веќе 11 години. Во овој период од срце инвестирав огромни средства за развој на спортовите во земјава. Драги пријатели, цената на ниту еден билет не може ниту, пак, сакам да го врати тоа што го вложив без никаква задршка во македонскиот ракомет, фудбал, тенис и друго. Токму поради тоа јас, од мое име и од името на управата на ФК Вардар, донесов одлука.

Долго време се воздржував да реагирам на навредите што се пласираа против мене од одредени медиуми и од поединци. Сакам да кажам, доста е! Никогаш во животот не сум доживеал ваков линч, навреди и омаловажување какво што доживеав во изминативе денови.

Ви благодарам многу, се чини дека ова е надомест за сè што направив. Доста е. Одлуката, колку и да ми беше тешко, ја донесов. Ова е последна сезона во која јас, Сергеј Самсоненко, како инвеститор вложувам во сите три спортски клуба во Македонија. По оваа сезона, ќе ги вратам трите клуба на поранешните сопственици во одлична состојба, со шампионски титули, добар ранкинг и без долгови.

Во врска со билетите за натпреварот Вардар-Фенербахче, одлучив да ги продаваме сите билети по единечна цена од 300 денари, без разлика на сектор или трибина. На сите кои купиле билет по стара цена, средствата ќе им бидат рефундирани.

Напред Вардар!
Сергеј Самсоненко

Сергеј Самсоненко е присутен во македонскиот спорт од средината на 2013 година. Најпрво го презеде управувањето на машкиот и женскиот ракометен клуб, а кон крајот на година да го прифати предизвикот и под своја капа го стави и фудбалскиот клуб. Низ годините направи респектибилни „црвено-црни“ колективи што беа неприкосновени во домашната сцена.

Русинот Самсоненко во приказната „Инвест ин Маседониа виа Белизе“

Фудбалерите се доминантни во прволигашката конкуренција во која за единствен сериозен ривал за титулата ја имаат Шкендија. Истото важи и за ракометарите и ракометарките кои во последните години се редовни учесници на Фајналфор турнирите во Лигата на шампиони. Кулминацијата се случи ова лето во Келн каде машката екипа ја освои титулата европски првак.

СКУП видео: Самсоненко под лупа во Русија, успешен во Македонија

Освен како спонзор на Вардар, Самсоненко во Македонија постојано беше под лупа на јавноста поради неговите релации со бизнисменот Јордан Камчев и блискоста со поранешната владеачка гарнитура.