Ракометарите на Вардар во атак по нова белешка за паметење во клупското досие. По историскиот пласман на Фајналфор во Лигата на шампиони попладнево (18 ч.) во обид да дофатат и финале во дебитантското учество на завршните турнири. Еден меч е, нема поправен и точно е дека се е можно во такви прилики, па макар ја имале и една Барселона на спротивната страна која важи за благ фаворит не само во полуфиналето туку и за освојување на пехарот.
„За првпат сме дел од еден вака голем и престижен турнир, но тоа не значи ништо. Подготвени сме за соочување со предизвикот и она што можам да го ветам од нас е борба. Толку години го чекавме овој момент и, конечно, го дочекавме. Дојдовме со цел што се надевам дека ќе ја реализираме. Сите четири екипи овде во Келн имаат подеднакви шанси за трофејот“, порачува Стојанче Стоилов, капитен на Вардар.
Црвено-црните“ се свесни со каков противник ќе имаат работа денеска, за неговиот квалитети и педигре, за притисокот што го носи и што, сето тоа само по себе, може да значи. Но, веројатно, и во Барселона, деветкратен европски титулар, се свесни дека опуштање не смее да има иако македонскиот првак е без искуство од вакви настапи бидејќи, не секогаш, во ситуаците „да се биде или не“ победува фаворитот на хартија. На Лазаров, Ристовски и колегите им е јасна потребата од максимална фокусираност, професионален пристап и адекватен одговор што доликува на гигант каков без сомнение е составот од „Блауграна“.
„Ќе играме со еден од најдобрите клубови со голема и богата историја. Ќе повторам дека е еден меч. Мотивираноста на екипата е честопати пресудна во вакви прилики. Искуството е на нивна страна, но и ние имаме соиграчи кои играле вакви натпревари. Тие треба да нè понесат. Сакаме да покажеме образ и дека заслужено стигнавме до Келн“, дополни Стоилов.
Душебаев: Гладни сме за титула, ќе решава одбраната
Фајналфор турнирот во Лигата на шампиони е сон на секој ракометар. Неговиот стана јаве во дресот на Вардар, а попладнево се надева во нова добра партија и пласман во големото финале. За клубот, за навивачите, за македонската јавност, но и за себе од причина што по Келн се разделува од „црвено-црните“ и се сели во Полски, во екипата на Кјелце во која ќе продолжи со својата кариера.
„Максимално сме мотивирани и подготвени за успех. Гладни сме за титула. Стигнавме до завршницата и имаме желба за нова демонстрација на најдоброто од нас. Барселона има искусна екипа што знае како е да се игра на завршен турнир и да се освојува титула. Ќе треба да извлечеме максимум од нас за победа. Да одиграме цврсто во одбрана и да бидеме на високо ниво во напад“, нагласи десниот бек, Алекс Душебаев кој во предвечерјето на престижниот настан во Келн беше промовиран во идеалниот тим во сезоната во ЛШ.
Гонзалез: Да издржиме во воведните 15 минути
И Раул Гонзалез со индивидуално признание, како Алекс Душебаев, во предвечерјето на престижниот настан во Германија. Шпанецот на македонската клупа е избран за најдобар тренер во елитното натпреварување, а во „Ланксес арената“ денеска ќе сака и да ја потврди номинацијата. Одлично го познава ривалот, кој доаѓа од неговата родна земја, кому му ја препушта фаворитската улога меѓутоа ветува борба за оправдување на присуството во Келн. И, се разбира, потајна верба за пласман во големото финале.
„Одличните ракометари и одличниот тренер ја прават Барселона одлична екипа. Многупати играле на Фајналфор и освојувале трофеи. Играат добра одбрана, имаат долга клупа и може да комбинираат. Анализа направивме и треба да издржиме во првите 15 минути, да бидеме внимателни и да не дозволиме да нè изненадат со нешто ново. Ќе биде тешко во секој случај, но наша желба е пласман во финале.
Во првото полуфинале на Фајналфор турнирот во Келн од 15,15 часот ќе играат унгарски Веспрем и ПСЖ. Во истиот термин утре е мечот за третото место, а од 18 часот и големото финале за континенталниот трон.