Мерката за поседување и приложување на сертификат за примена, најмалку, прва доза на вакцина против ковид-19 или сертификат за прележаност на вирусот не постар од 45 дена, сметајќи од денот на оздравување, при влез во кафулиња, ресторани, молови, обложувалници, казина, итн., останува на сила. Ова е само една од одлуките на 101-та седница на Владата што се одржа попладнево.

Се дозволува и организирање и одржување на спортски натпревари со присуство на публика, потоа настани од културата, на концерти, на семинари, на работилници и други настани на затворено со 30 отсто од капацитетот на просторот, а на отворено до 50 отсто од капацитетот, со почитување на протоколите за заштита од ковид-19.

Во сите угостителски објекти, кафулиња и барови чиј капацитет е поголем од 30 посетители/гости/лица, задолжително e воспоставување на редарска служба од правниот субјект за контрола и спроведување на мерката. Додека пак во угостителските објекти со капацитет помал од 30 лица, контролата на поседувањето на ковид-19 сертификатот на посетителите е должност на редовно вработените лица.

Останува и забраната за организација на свадби, веселби и прослави во објекти од затворен тип, додека друг тип на настани на затворено и натаму може да се организираат со исполнетост до 30 отсто од капацитетот на местото каде што се одржува настанот и ограничен број на посетители до максимум 1.000 посетители со задолжително поседување, приложување и проверка на еден од задолжителните ковид-19 документи.

Домашни и странски државјани ќе можат да влезат на територијата на Република Северна Македонија од 1 септември, доколку претходно на граничниот премин приложат:

– Сертификат/потврда за извршена имунизација (вакцинација) од вирусот SARS-CoV-2, односно примени најмалку две дози на вакцина против заразната болест ковид-19 или

– Сертификат/потврда за прележан ковид-19 во последните 45 дена, сметајќи од денот на оздравувањето; или

– Медицинска потврда со негативен резултат од RT PCR SARS-CoV-2 тест, направен 72 часа пред влез на територијата на Република Северна Македонија.

За нашите граѓани кои ќе се враќаат во земјата по 1 септември, а немаат ПЦР тест или потврди за примена вакцина или за прележан ковид-19, ќе се одреди мерка карантин од 7 (седум) дена домашна изолација со решение од Државниот санитарен и здравствен инспекторат (ДСЗИ).

Странските државјани кои транзитираат низ земјата ќе можат да го направат тоа во рок од пет часа со претходно потпишана изјава на влезот во земјата која ќе треба да ја приложат пред граничната контрола на излезот од државата.