Денешното продолжение на „Шарената Револуција“ која трае над две недели низ улиците на Скопје но и во другите градови на Македонија започна пред просториите на Специјалното јавно обвинителство (СЈО), каде Сојузот на борци ја даде поддршката за граѓаните кои протестираат револтирани од одлуката на претседателот Ѓорѓе Иванов за аболиција на политичарите пред избори но и против власта и екс-премиерот Никола Груевски.
Дождот и ветрот не беа пречка за масовно присуство на граѓани од најразлична возраст да го започнат протестот во 18 часот со поддршка за работата на СЈО. Демонстрантите со нови беџови „Слобода за Здравко“ порачаа итно ослободување на професорот Здравко Савески, член на новата партија Левица, на кој пак во меѓувреме му беше изречена мерка куќен притвор и му беше одземен пасошот.
Од седиштето на СЈО протестот продолжи кон Собранието на Република Македонија, пропратен со полициски барикади од страните, односно пред ТЦЦ Плаза од каде што правецот води кон седиштетот на партијата ВМРО-ДПМНЕ, потоа Министерството за Правда и Народната канцеларија на Ѓорѓе Иванов, локации кои претходно беа место за изразување на револтот на граѓаните.
Пред Собранието пред граѓаните-демонстранти зборуваа активистот Петрит Сарачини, професорот Иван Бабановски, пејачката Кристина Арнаудова, економскиот аналитичар Бранимир Јовановиќ како и портпаролот на СДСМ, Петре Шилегов.
Сите тие во своите говори потенцираа дека општествената состојба во Македонија мора да се промени за подобра иднина на идните генерации кои доаѓаат.
Пејачката Кристина Арнаудова пред републичкото Собрание порача дека има милион причини да протестира зошто сака да го каже својот став, но и дека протестира во името на нејзините колеги и сите оние кои избрале да молчат.
– Протестирам за моите пријалите кои си заминаа. Повеќе заминаа од државата отколку што останаа. Протестирам и за оние кои поради закана за нивните работни места мора да молчат. Протестирам и во име на моите колеги кои одбрале да молчат затоа што изборните кампањи се најдобро платените тезги, други веќе немаме, рече Арнаудова.
По речиси 1 час демонстрација на незадоволство протестот се пресели пред Министерството за надворешни работи, чие барокно седиште, воедно е и најновиот објект обоен во знак на Шарената револуција.
Како и вообичаено протестот заврши со скандирања против екс-премиерот Никола Груевски, пред Владата на Република Македонија, каде пред заминување на демонстрантите се сруши скелето на едната страна на објектот, што наиде на одобрување и извици од големата група граѓани.
Повеќе погледнете погоре во видеото. Протестите продолжуваат и утре во 18 часот пред седиштетот на СЈО.