Можни се тензии и притисоци од членството на ВМРО-ДПМНЕ, ако се прекрши принципот на коалицирање на победник со победник, истакнале денеска од партијата на средба со амбасадорот на Британија Чарлс Гарет и британскиот министер за Европа и Америка, Алан Данкан.
„Ние сме под голем притисок на нашите гласачи и нашето членство да се бориме и да не го дозволиме нарушувањето на тој принцип, затоа што во основа ние правично постапуваме цело време и сега некој друг не постапува правично кон нас. Ние ќе направиме се што е во наша моќ да ги задржиме мирот и стабилноста, но не знаеме како ќе се одвиваат работите. Ќе има тензија, луѓето се вознемирени, тоа е главната тема во нашата држава. Македонците поради тоа се длабоко фрустрирани особено што ова се прави поради неуставен закон за двојазичност на целата територија. Не сме убедени и дека една таква влада може да ги постигне тие цели во една таква атмосфера. Затоа предложивме дека е добро да се направат нови парламентарни избори“, рекле од ВМРО-ДПМНЕ пред дипломатите.
Според соопштението на партијата, Данкан на ова одговорил „Наш заеднички интерес е да се остварат долгорочните цели на државата врзани со нејзините приоритети и нејзините интереси. Што се однесува до формирањето на Влада, тоа не е наша работа. Тоа е ваша работа, работа на партиите“.
Од партијата посочиле дека ако сега се прекрши принципот, истиот во иднина никогаш повеќе нема да важи бидејќи победникот повеќе би добил во коалиционите разговори од вториот или третиот по ред поголем партнер, отколку што би добил од најголемиот партнер за разговори.
На прашањето на амбасадорот Гарет, кои ќе бидат следните чекори на ВМРО-ДПМНЕ ако СДСМ формира влада со ДУИ, од партијата одговориле дека „има долга листа на чекори, но што конкретно би одбрале, не може да биде соопштено во овој момент“.
За рокот на СЈО од ВМРО-ДПМНЕ истакнале дека треба да се остане на она што било договорено во Пржино, и покрај тоа СЈО работело непрофесионално и како партиски огранок на СДСМ кој терал хајка против нивната партија.
На средбата присуствувале лидерот на партијата, Никола Груевски, Никола Попоски и Александар Николоски.