Британскиот премиер Борис Џонсон и останатите лидери на земјите членки на Г7 не успеаја да ги убедат САД да ги задржат војниците во Авганистан за да продолжат со напорите за евакуација до крајот на месецот, јави агенцијата ДПА.

Се очекуваше британскиот премиер да изврши притисок врз американскиот претседател Џо Бајден да ги задржи своите сили на терен по 31 август, бидејќи тие обезбедуваат сигурност на аеродромот во Кабул, со цел да се овозможи на луѓето да ја напуштат земјата.

Но, по вонредниот состанок на лидерите на Г-7, со кој претседаваше Џонсон, Бајден рече дека рокот останува во сила.

Ќе направиме сè што можеме до последна минута, но слушнавте што рече претседателот на САД, слушнавте што рекоа талибанците, рече Џонсон и изрази увереност дека можат да се извлечат илјадници други. Сепак тој истакна дека ситуацијата на аеродромот не се подобрува.

Џонсон рече дека лидерите се согласиле за „условот број еден“ по 31 август, талибанците да мора да обезбедат „безбеден премин за оние што сакаат да излезат“.