Францускиот претседател Емануел Макрон изјави дека ќе именува нов премиер во наредните денови, откако Мишел Барние поднесе оставка по гласањето недоверба во парламентот.
Во 10-минутното обраќање до нацијата во четвртокот, тој го отфрли притисокот од опозицијата да се повлече, ветувајќи дека ќе остане на својата функција целосно, до крајот на мандатот во 2027 година.
Тој му се заблагодари на Барние за неговата посветеност за време на неговиот кус мандат како премиер и ја обвини француската крајна десница и цврста левица дека соработуваат за соборување на владата.
Француските пратеници со големо мнозинство гласаа за смена на Барние во средата, само три месеци откако беше назначен од Макрон.
Гласањето беше првпат француска влада да биде изгласана од парламентот по повеќе од 60 години, потег што Макрон го означи како „без преседан“.
Во Франција, претседателот е тој што го избира премиерот кој потоа раководи со владата. Но, премиерот мора да одговара пред парламентот и Барние издржа само три месеци пред да биде сменет со гласање недоверба.
Да се најде некој што нема веднаш да биде отфрлен од парламентот може да биде тешко за Макрон, чија одлука во јуни да распише предвремени избори доведе до ќор-сокак на парламентот.
Националното собрание сега е поделено на три големи гласачки блока – лев, центар и крајно десен. Ако следниот избор на Макрон за премиер трае, се смета дека барем дел од левиот блок ќе треба да се убеди да се приклучи на следната влада.
Претседателот требаше да разговара со неколку политички лидери во петокот, откако му кажа на францускиот народ дека „во наредните денови ќе назначи премиер кој ќе формира влада од општ интерес“.
Тој прво требаше да разговара со центристите во „таборот Макрон“, пред да се сретне со лидерите на социјалистите, со надеж дека ќе ги убеди да се одвојат од поширокиот лев блок, Новиот народен фронт. Тој ќе разговара и со десничарските републиканци.
Водачот на социјалистите, Оливие Форе, пред разговорите рече дека е отворен за дискусија и „компромиси за секое прашање“ за формирање влада врз основа на „договор на определено време“. Но, тој јасно стави до знаење дека има мала желба да „обезбеди континуитет на макронизмот“.
Не може да се одржат нови парламентарни избори до јули 2025 година, што може да ги објасни забелешките на Форе дека е отворен за ограничен мандат за следната влада.