Универзитетскиот професор и поранешен премиер Владо Бучковски и политичкиот аналитичар Џелал Незири за „Фокус“ со прогнози за мртва трка на претстојните парламентарни избори. Главната борба, неспорно, е меѓу коалициите „Можеме“ на СДСМ и „Обнова на Македонија“ на ВМРО-ДПМНЕ, но ставовите на двајцата се однесуваат на тесен изборен резултат што ќе зависи од распределбата на бројот на пратеници по изборни единици. Кај албанскиот блок, пак, и едниот и другиот даваат предност на ДУИ.
Според Бучковски, победничката коалиција на предвремените парламентарни избори ќе освои 50 мандати наспроти 48. на поразената. Притоа ги споделува сопствените перцепции за победа на ривалските табори по изборни единици (ИЕ), пришто како клучни ги издвојува првата и шестата.
„Резултатот ќе биде тесен. Ќе одлучува фото-финишот. СДСМ е фаворит во првата и во шестата изборна единица. Ако победи со 10-8 во првата и со 5-3 во шестата ИЕ, СДСМ ќе биде севкупен победник, зашто очекувам во втората, во четвртата и во петтата изборна единица да биде нерешено, а во третата ИЕ да победи ВМРО-ДПМНЕ во 11-9. Во овие мои прогнози, СДСМ би освоил 50, а ВМРО-ДПМНЕ 48 мандати. Од друга страна, што би била победничка формула за ВМРО-ДПМНЕ? – Во првата и во шестата ИЕ да изгуби со разлика од еден мандат, а тоа да го надомести со победа од два мандата разлика во третата ИЕ, да има еден мандат повеќе во втората и во петтата ИЕ, а во четвртата ИЕ да биде нерешено 10-10. Во ваков распоред на мандатите, ДПМНЕ би имал 50, а СДСМ 48 пратеници“, прогнозира Бучковски за „Фокус“.
Тој очекува тесна битка и во рамки на албанскиот блок во кој, според него, ДУИ ќе победи пред Алијансата за Албанците со 11-9 во однос на пратенички мандати. Бучковски прогнозира по еден мандат да добијат ДПА и Левица.
Незири во прогнозата се потпира на резултатите од досега објавените анкети. Се разбира од веродостојните извори. И тој смета на израмнет резултат меѓу СДСМ и ВМРО-ДПМНЕ и блага предност на ДУИ во однос на коалицијата меѓу Алијанса за Албанците и Алтернатива. Но, не исклучува изненадувања за што упатува на неодамнешните избори во Хрватска, а во тој контекст ги посочува и локалните избори од 2017 година.
„Ако навистина излезе ваков резултат, тогаш ниту СДСМ ниту ВМРО-ДПМНЕ нема да можат да формираат влада без ДУИ. Но, изборите во Хрватска покажаа дека анкетите можат да бидат грубо демантирани на денот на изборите. Или за локалните избори во 2017 година, кога анкетите предвидуваа мртва трка меѓу ВМРО-ДПМНЕ и СДСМ, но СДСМ на крај ги освои речиси сите општини во земјава“, коментира Незири.