Активистите на владејачката партија во Унгарија Фидеш на Виктор Орбан покренаа вознемирувачка кампања на означување на канцелариите кои се занимаваат со заштита на човековите права и и помош за мигрантите.
На вратите на невладините организации лепат етикети на кои пишува „Промигрантска организација“, а една од оние кои се означени на ваков начин е унгарската канцеларија на Амнeсти интернешенал.
Тоа лично го направил висок финкционер на Фидеш Иштван Холик, кој беше пратеник во минатиот состав на Парламентот.
Истото го направиле и со канцеларијата на организацијата Менедек (или во превод азил), означувајчи ја со видлива етикета на нивната влезна врата.
Она што е значајно за оваа органзиација Менедек е дека е сместена во зградата во која во 1944 година нацистите ставиле Давидова ѕвезда, бидејќи во неа тогаш живееле Евреи. Во последните две години на Втората светска војна поголем дел од стотината илјади унгарски Евреи биле депортирани во Аушвиц и други логори каде биле бритално убиени.
Кампањата на Орбан против невладините организации
Истата оваа пракса на означување на канцеларии на невладините организации во Србија ја спроведува екстремистичката група Заветници, но во Унгарија тоа го прави владејачката партија на Орбан, што е посебно застрашувачки.
Сето тоа е дел од пошироката кампања против невладините органзиации особено оние кои им помагаат на мигрантите, за што во иднина во Унгарија се поанира и затворска казна.
Стоп Сорос
Фондацијата на унгарскиот милијардер Џорџ Сорос во мај официјално најави дека ги затвора канцелариите во Будимпешта и се сели во Берлин како одговор, на како што го, нарече зголемен „репресивен политички и законски амбиент во Унгарија“.
Фондацијата „Отворено општество“ ги истакнува ограничувањата за невладините организации и кои се очекува да бидат меѓу првите законски приоритети на новиот состав во унгарскиот Парламент.
Овој потег на Фондацијата следи откако Орбан беше повторно избран за премиер.
Заминувањето на Фондацијата „Отворено општество“ од Будимпешта уште во април го најави австрискиот весник „Ди Пресе“, но тогаш немаше официјална потврда.
Унгарскиот премиер Виктор Орбан ја нападна работата на американскиот милијардер со унгарско потекло, обвинувајќи го за мешање во внатрешните работи на земјата и за помагање на опозицијата.
Една од неговите цели беше Централно европскиот универзитет (ЦЕУ) со седиште во Будимпешта. Орбан во април лани донесе контроверзен закон за образование чиј таргет беше токму овој Универзитет чиј основач е Сорос.
Илјадници студенти одржаа протести против наводните реформи во образованието на Орбан, чиј повод беше токму овој закон, но пораката беше дека се воведува цензура.
Во октомври лани, Орбан му даде рок на Универзитетот од една година да се прилагоди на одредбите од законот.
Унгарскиот премиер повеќепати го обвини Сорос и ЕУ за мигрантската криза и одби да ги почитува правилата за згрижување на бегалците,.
Унгарската националистичка влада на чело со Орбан во јануари усвои нов пакет закони за борба против илегалната имиграција, за која вели дека ја поткопува европската стабилност и е делумно поттикната од милијардерот Џорџ Сорос.
Пакетот закони, наречен „Стоп Сорос“, предвидува задолжителна регистрација на некои невладини организации кои ја поддржуваат илегалната имиграција.
Исто така, ќе се воведе данок од 25% на сите странски донации што ги примаат невладини организации, а активистите би можеле да добијат ограничен пристап до унгарските граници на Европската Унија, кои се оградени откако мигрантите почнаа масовно да доаѓаат во 2015 година.
Стоп операција Сорос во Македонија
За време на власта на ВМРО ДПМНЕ, во јануари 2017 и во Македонија беше основана граѓанска организација Стоп операција Сорос, која преку црна кампања во медиумите под контрола на режимот на Никола Груевски ширеше лажни вести и навреди за новинари, политичари и други јавни личности.
Ова здружение ја етикетираше Фондацијата Сорос како „радикална левичарска и тоталитарна“, и дека нејзината цел е „да се избришат идентитети, народи и нации и да се создаде едно „отвореноопштество“ со кое ќе управува некој од надвор“, што според нив „сериозно ја загрозува безбедноста на Македонија преку своето делување“.
Како негови основачи во медиуите се појавуваа новинарите Цветин Чилиманов, Ненад Мирчевски и Никола Србов.
Во ноември лани Владата на Зоран Заев ги затвори сите истраги што режимот на Груевски ги започна за наводна „десоросоизација“, по неговиот говор кон крајот на 2016, пред ДИК, кога упати закани и до странските претставници во земјава, по што тогашната власт започна хајка против 21 невладина организација кои ги етикетираше како „непријатели на власта и на државата“, а како нивен финансиер го посочуваа сопственикот на фондацијата Сорос, Џорџ Сорос.
Со месеци во истрагите беа вклучени и МВР и УЈП, но беа пронајдени никакви докази за сомнително работење или направени прекршоци.
Во март годинава, министрерот за внатрешни работи Оливер Спасовски на директна средба со невладините организации и граѓански здруженија кои беа цел на оваа хајка, им соопшти дека не постојат докази за обвинувањата кои беа основа за оваа истрага.