Врховниот суд вчера заседавал во однос на притворот на Сеад Кочан, осомничен во случајот „Труст“ и кој веќе два месеци е во бегство. Оттаму велат донесена е одлука, но одлуката за тоа дали притворот ќе му биде укинат или не ќе биде соопштена во понеделник.
Од Судот за НОВА велат, ако досега одлуката не е објавена на веб страницата на Судот, тоа ќе биде направено во понеделник.
Алсат-М објави дека одлуката за притвор на сопственикот на „Трансмет“ Врховниот суд ја укинал.
Ова значи дека се поништува домашната и меѓународната потерница која полицијата ја распиша за него пред околу 2 месеци, откако тој избега од државата, а од неговата компанија тврдат дека е на „службен пат“.
Ваквиот развој на настаните доаѓа откако неодамна Кривичниот суд по барање на Специјалното јавно обвинителство замрзна имот и три сметки на сопственикот на „Трансмет“.
Последен кој реагираше за притворот на сопственикот на телевизијата „Нова“, (која никако не е поврзана со НОВА ТВ), беше првиот човек на Обвинителството, Марко Зврлевски кој достави барање за заштита на законитоста за притворот на бизнисменот Сеад Кочан до новиот претседател на Врховниот суд, Јово Вангеловски.
Во „Труст“, Кочан се сомничи дека со фалсификувана документација заедно со фирмите „Силекс Неметали и „Вато“ добиле тендер од државната ЕЛЕМ вреден 17 милиони евра.