Дваесет држави на ЕУ влегуваат во амбициозен проект и креирање на европско обвинителство. Негова задача ќе бидат истраги за финански криминал во земјите учеснички во проектот.
Помеѓу земјите учеснички се и повеќе земји од нашиот регион како Бугарија, Грција, Хрватска, Словенија или Романија.
Министрите за правда на овие 20 земји денес ја договорија улогата и надлежностите на ова обвинителство чие што седиште ќе биде во Луксембург. Креирањето на оваа институција е во рамките на зајакнатата соработка помеѓу земјите членки на ЕУ.
Целта на обвинителството е да води истраги но пред се да ги координира истрагите кои се водат во 20те земји учеснички во овој проект.
Тоа значи дека нема да се води истрага за ист случај во повеќе земји членки. Истовремено тоа ќе значи и зголемување на бројот на истрагите за да се дојде до повеќе пресуди и поефикасно враќање на парите од европските фондови кои биле злоупотребени и довеле во финансиски криминал.
ОЛАФ, ЕУ Бирото за борба против корупцијата кое веќе постои може да води истраги но нема надлежности кои би дозволиле оштетените земји членки да можат да ги вратат парите од корупцијата.
Во ЕУ обвинителството учестуваат Бугарија, Хрватска, Кипар, Чешка, Германија, Грција, Шпанија, Естонија , Финска, Франција, Летонија, Литванија, Луксембург, Португал, Романија, Словенија, Словачка, Италија, Белгија и Австрија.
Обвинителството почнува да работи во текот на 2018 година или најдоцна на почетокот на 2019 година.
Оваа институција можеби ќе го преземе случајот “Актор”. Случај за кој ОЛАФ ја казни грчката компанија „Актор“ со 50 милиони евра поради измама и перење пари при изградба на автопатот Демир Капија – Смоквица.